Sanctuaire de Notre-Dame de Kibeho

Abatagatifu twizihiza: Théodora, Élie, Emilien, Marcel

    Isomo rya Mbere

    Isomo ryo mu ibaruwa Mutagatifu Pawulo Intumwa yandikiye Abanyakolosi(Kol 1,24-29; 2, 1-3)

    Bavandimwe, ubu rero nshimishijwe n’uko mbabara ari mwe ngirira, maze ibyari bibuze ku mibabaro ya Kristu, nkabyuzuriza mu mubiri wanjye, mbigirira umubiri we, ari wo Kiliziya. Koko rero, nabaye umugaragu wa Kiliziya, biturutse ku murimo Imana yanshinze muri mwe: ni uwo kubagezaho byuzuye ijambo ry’Imana, mbamenyesha ibanga ryari ryarahishwekuva kera kose no mu bisekuruza byose, none rikaba rimaze guhishurirwa abatagatifujwe bayo. Ni bo Imana yishakiye kumenyesha ikuzo n’ibyiza bitagereranywa iryo banga rizanira abanyamahanga: Kristu ari muri mwe, We uzaduhesha ikuzo twizeye! Kristu uwo nyine ni We twamamaza, tuburira buri muntu kandi tumwigisha ubwenge bwose, kugira ngo buri wese tumuhindure intungane muri Kristu. Ngicyo icyo nduhira nkakirwanirira nkoresheje imbaraga zose mpora nterwa na We. Nifuza rero ko mumenya intambara ikomeye mbarwanira, mwebwe n’abo muri Lawodiseya, ndetse n’abandi batigeze bambona n’amaso yabo. Icyo mparanira ni uko imitima yabo ihumurizwa, bakibumbira mu rukundo, kandi bakagera ku bumenyi bwuzuye bw’ibanga ry’Imana, ari ryo Kristu, We nganzo iganjemo icyitwa ubuhanga n’ubumenyi cyose.

Iryo ni Ijambo ry’Imana.

    ZABURI

    Zaburi ya 62 (61), 6-7, 8-9

    Agakiza kanjye n’ishema ryanjye mbikesha Imana.

    Mutima wanjye, shakira amahoro iruhande rw’Imana yonyine. kuko amiringiro yanjye yose ari yo akomokaho. Ni yo yoyonyine rutare rwanjye n’agakiza kanjye, ni yo buhungiro butavogerwa, sinteze guhungabana.

Rubanda mwese, nimuyiringire igihe cyose, muyibwire ikibari ku mutima; rwose Imana ni yo buhungiro bwacu !

    Amagambo yo mu lvanjili ntagatifu uko yanditswe na Mutagatifu Luka(Lk 6,6-11)

    Muri icyo gihe, ku wundi munsi w’isabato Yezu yinjira mu isengero arigisha. Ubwo bakaba umuntu ufite ikiganza cy’iburyo cyumiranye. Abigishamategeko n’Abafarizayi baramugenzura ngo barebe ko amukiza ku munsi w’isabato, maze babone icyo bamurega. We rero amenya ibitekerezo byabo, abwira uwo muntu wari ufite ikiganza cyumiranye ati « Haguruka uhagarare hano hagati! » Arahaguruka, arahagarara. Nuko Yezu arababwira ati « Reka mbabaze: icyemewe ku munsi w’isabato ni ikihe? Ari ukugira neza, cyangwa ari ukugira nabi? Ari ugukiza umuntu, cyangwa se kumwica? » Nuko abararanganyamo amaso, maze abwira wa muntu ati « Rambura ikiganza cyawe. » Abigenza atyo, ikiganza cye giherako kirakira. Ariko bo barabisha, basigara bashaka uko bagenza Yezu.

Iyo ni Ivanjili Ntagatifu

Mu isomo rya mbere Pawulo intumwa aratwibutsa ko Kristu ari muri twe, kandi akaba ariwe uzaduhesha ikuzo twizeye, dusabwe kumwamamaza mu mvugo no mu ngiro tukaburira abantu bose, dufite inyota n’ishyaka ryo kubamenyesha Yezu twamenye, we utanga ubutungane. Ikiduha kugera ku butungane ni ijambo rye, igihe turyakiranye ukwemera, ni amasakramentu twakiriramo umukiro, ni ibikorwa byiza dukora. Kimwe na Pawulo twiyemeze kwamamaza Kristu dukoreshsje imbaraga zose adutera, duharanire guhumuriza abandi , kubakomeza mu kwemera, urukundo no gusakaza amahoro. Twigire kuri Pawulo mutagatifu guhangayikishwa n’umukiro w’abantu bose kandi duharanire kubafasha gukura mu kwemera no mu rukundo, twishimire intambwe nziza bagezeho, tubabazwe nuko badahinduka

Mu ivanjiri Yezu arakiza umuntu kw’isabato kuko aha agaciro ikiremwa muntu, ubutumwa bwa Yezu ni uko ikintu cyose giha muntu agaciro kigomba kuza mbere y’umugenzo n’amategeko, Yezu aratwibutsa ko iminsi yose ari iyi Mana. Nt gihe cyiza cyo gukora neza nkuko nta n’igihe cyibi cyo gukora nabi. Iminsi yose ni iy’Imana kandi tuyikoremo ibyiza.

Yezu aratwibutsa ko urukundo rwo gutabara no gutanga ubuzima rurenze kure imigenzo ndetse nibyo abantu bakora nk’itegeko ariko babifitemo urukundo.

Dusabe nyagasani ingabire yo kugira ishyaka ryo kwamamaza inkuru nziza no gukora ibyiza tutiganda, Umubyeyi Bikra Mariya udusabire.

 

Padiri Jean Pierre GATETE SAC